શું બુમરાહ ચેમ્પિયન્સ ટ્રોફી માટે ફિટ થઈ શકશે? નિર્ણય આવતીકાલે લેવાશે

Champions Trophy: ICC ચેમ્પિયન્સ ટ્રોફી શરૂ થવામાં હવે વધુ સમય બાકી નથી અને ભારત આ ટુર્નામેન્ટ માટે સ્ટાર ફાસ્ટ બોલર જસપ્રીત બુમરાહની ઉપલબ્ધતા અંગે અંતિમ નિર્ણય મંગળવારે એટલે કે 11 ફેબ્રુઆરીએ લઈ શકે છે. બુમરાહની ફિટનેસ અંગે અનિશ્ચિતતા છે, પરંતુ ICCને અંતિમ ટીમની યાદી આપવાની અંતિમ તારીખ નજીક આવી રહી છે.

બુમરાહનો 15 પ્લેયરની ટીમમાં સમાવેશ થાય છે.
બુમરાહનું તાજેતરમાં બેંગલુરુમાં ભારતીય ક્રિકેટ કંટ્રોલ બોર્ડ (BCCI)ના સેન્ટર ઓફ એક્સેલન્સ ખાતે સ્કેન કરવામાં આવ્યું હતું. BCCIની મેડિકલ ટીમ કોઈપણ નિર્ણય લેતા પહેલા સિલેક્ટર્સ અને ટીમ મેનેજમેન્ટ સાથે ચર્ચા કરશે. ગયા મહિને ચેમ્પિયન્સ ટ્રોફી માટે જાહેર કરાયેલી ભારતની 15 પ્લેયરની પ્રારંભિક ટીમમાં બુમરાહનો સમાવેશ કરવામાં આવ્યો હતો, પરંતુ તે ઇંગ્લેન્ડ સામેની ODI શ્રેણીમાં રમી શક્યો ન હતો, જે 19 ફેબ્રુઆરીથી શરૂ થતી ચેમ્પિયન્સ ટ્રોફી પહેલા ભારતની છેલ્લી શ્રેણી છે.

એવી અપેક્ષા હતી કે બુમરાહ ત્રીજી વનડે રમવા માટે અમદાવાદ જશે, પરંતુ તે તેના બદલે બેંગલુરુ ગયો. જાન્યુઆરીમાં ટીમની જાહેરાત કરતી વખતે મુખ્ય સિલેક્ટર અજિત અગરકરે કહ્યું હતું કે BCCI મેડિકલ સ્ટાફ દ્વારા આપવામાં આવેલી માહિતી મુજબ બુમરાહ ઇંગ્લેન્ડ સામેની પ્રથમ બે મેચમાં રમી શકશે નહીં. અગરકરે ખુલાસો કર્યો હતો કે બુમરાહને ફેબ્રુઆરીના પહેલા અઠવાડિયામાં સ્કેન પહેલા 5 અઠવાડિયા સુધી બોલિંગ ન કરવાની સલાહ આપવામાં આવી છે.

જો ફિટ નહીં હોય તો કોને તક મળશે?
બુમરાહ સિડનીમાં ઓસ્ટ્રેલિયા સામેની પાંચમી ટેસ્ટ દરમિયાન ઘાયલ થયો હતો અને ત્યારથી તે કોઈ મેચ રમી શક્યો નથી. એવું માનવામાં આવે છે કે તેને કમરની કોઈ તકલીફ છે જેને સ્વસ્થ થવા માટે 5 અઠવાડિયાના આરામની જરૂર છે. જો બુમરાહ ફિટનેસના કારણે ચેમ્પિયન્સ ટ્રોફીમાં ન જઈ શકે તો તેના સ્થાને હર્ષિત રાણાને ટીમમાં સામેલ કરી શકાય છે. હર્ષિતે ઈંગ્લેન્ડ સામેની ODI શ્રેણીમાં ડેબ્યૂ કર્યું હતું અને શરૂઆતની બંને મેચમાં રમ્યો હતો.

ભારતનો સમાવેશ ગ્રુપ Aમાં કરવામાં આવ્યો છે.
જો બુમરાહ ટુર્નામેન્ટના મધ્ય કે અંતિમ તબક્કામાં રમવા માટે ફિટ થવાની શક્યતા છે, તો તે 15 સભ્યોની ટીમનો ભાગ રહેશે. ICCના નિયમો મુજબ 11 ફેબ્રુઆરી પછી કોઈપણ ખેલાડીની બદલી માટે ટુર્નામેન્ટની ટેકનિકલ સમિતિની મંજૂરી જરૂરી રહેશે. ચેમ્પિયન્સ ટ્રોફીમાં ભારતને ગ્રુપ Aમાં રાખવામાં આવ્યું છે. જેમાં પાકિસ્તાન, બાંગ્લાદેશ અને ન્યૂઝીલેન્ડ પણ શામેલ છે. ટુર્નામેન્ટ માટે પાકિસ્તાન જવાનો ઇનકાર કર્યા બાદ ભારતે તેની બધી મેચ દુબઈમાં હાઇબ્રિડ મોડેલ હેઠળ રમશે. ભારત 20 ફેબ્રુઆરીએ બાંગ્લાદેશ સામે શરૂઆત કરશે, જ્યારે 23 ફેબ્રુઆરીએ પાકિસ્તાન સામે રમશે અને ત્યારબાદ ટીમ 2 માર્ચે ન્યૂઝીલેન્ડ સામે રમશે.