ભારત ગમે ત્યારે હુમલો કરી શકે છે, પાકિસ્તાનમાં હાઈ એલર્ટ: પાક. સંરક્ષણમંત્રી ખ્વાજા આસિફ
Pahalgam Terror Attack: પહલગામ આતંકવાદી હુમલા બાદ ભારતની કાર્યવાહીથી પાકિસ્તાન સરકાર ડરી ગઈ છે. પાકિસ્તાનના સંરક્ષણમંત્રી ખ્વાજા મોહમ્મદ આસિફે કહ્યું કે ભારત ગમે ત્યારે હુમલો કરી શકે છે. આવી સ્થિતિમાં સેનાને સંપૂર્ણ રીતે તૈયાર રાખવામાં આવી છે. ખ્વાજા આસિફે કહ્યું કે આ પરિસ્થિતિઓમાં કેટલાક રાજદ્વારી નિર્ણયો લેવા પડશે, જે લેવામાં આવી રહ્યા છે.
પાકિસ્તાન સંપૂર્ણપણે સતર્ક: ખ્વાજા આસિફ
રોઇટર્સના અહેવાલ મુજબ, ખ્વાજા આસિફે કહ્યું કે પાકિસ્તાની સેનાએ સરકારને ભારતીય હુમલાની સંભાવના વિશે જાણકારી આપી છે. આસિફે કહ્યું કે પાકિસ્તાન સંપૂર્ણપણે સતર્ક છે અને જો આપણા અસ્તિત્વ માટે સીધો ખતરો હશે તો જ આપણે આપણા પરમાણુ શસ્ત્રોનો ઉપયોગ કરીશું. અગાઉ સિંધુ જળસંધિ પર ભારતના નિર્ણયથી ડરતા, ખ્વાજા આસિફે કહ્યું હતું કે ભારત પાણીનો ઉપયોગ હથિયાર તરીકે કરી રહ્યું છે.
બૈસરન ઘાટીમાં અંધાધૂંધ ગોળીબાર
પહલગામ આતંકવાદી હુમલા અંગે આખો દેશ આતંકવાદને આશ્રય આપનારા પાકિસ્તાન સામે કડક કાર્યવાહીની માંગ કરી રહ્યો છે. બીજી બાજુ, પાકિસ્તાનના વડાપ્રધાન શાહબાઝ શરીફે 26 એપ્રિલે કહ્યું કે તેઓ પહલગામમાં 26 લોકોની હત્યાની કોઈપણ નિષ્પક્ષ અને પારદર્શક તપાસ માટે તૈયાર છે. 22 એપ્રિલના રોજ, આતંકવાદીઓએ જમ્મુ અને કાશ્મીરના લોકપ્રિય પર્યટન સ્થળ, પહેલગામની બૈસરન ઘાટીમાં લોકો (મોટાભાગે પ્રવાસીઓ) પર અંધાધૂંધ ગોળીબાર કર્યો હતો. આ હુમલામાં ઓછામાં ઓછા 26 લોકો માર્યા ગયા હતા અને ઘણા લોકો ઘાયલ થયા હતા.
