ટેક્નિકલ સમસ્યાના કારણે ઈન્ડિગોની સિસ્ટમ થઈ ધીમી, ફ્લાઈટ ઓપરેશનને ગંભીર અસર
Indigo Server Down: ટેક્નિકલ કારણોસર ઈન્ડિગો એરલાઈન્સની સિસ્ટમ ખૂબ જ ધીમી ગતિએ કામ કરી રહી છે. આ સમસ્યા એરલાઇન્સના સમગ્ર નેટવર્કમાં જોવા મળી રહી છે, જેના કારણે એરલાઇન્સની ફ્લાઇટ સેવાઓ પ્રભાવિત થઈ છે. જેના કારણે મુસાફરોને ભારે મુશ્કેલીનો સામનો કરવો પડી રહ્યો છે અને જુદા જુદા એરપોર્ટ પર ચેક-ઈન અને બેગેજ ચેક કરવા માટે મુસાફરોની લાંબી કતારો જોવા મળી રહી છે.
ઈન્ડિગોએ જાહેર કર્યું સત્તાવાર નિવેદન
ઈન્ડિગોએ એક નિવેદન જાહેર કરીને કહ્યું છે કે ‘અમે હાલમાં અમારા સમગ્ર નેટવર્ક પર કામચલાઉ સિસ્ટમ મંદીની સમસ્યાનો સામનો કરી રહ્યા છીએ. આના કારણે અમારી વેબસાઇટ અને બુકિંગ સિસ્ટમ પણ પ્રભાવિત થઈ છે. જેના કારણે મુસાફરોને થોડી વધુ રાહ જોવી પડે છે. ચેક-ઈન ધીમું થઈ રહ્યું છે અને એરપોર્ટ પર લાંબી કતારો છે.
ઈન્ડિગોએ કહ્યું છે કે ‘અમારી એરપોર્ટ ટીમો સંપૂર્ણ સમર્પણ સાથે કામ કરી રહી છે અને પેસેન્જરોને કોઈ સમસ્યા ન થાય તે સુનિશ્ચિત કરવાનો પ્રયાસ કરી રહી છે. અમારો પ્રયાસ છે કે પરિસ્થિતિ જલ્દી સામાન્ય થઈ જાય. મુસાફરોને પડેલી અસુવિધા બદલ અમે દિલગીર છીએ.
