બાંગ્લાદેશ પોલીસે મંદિરમાં તોડફોડ કરવા બદલ 4 લોકોની કરી ધરપકડ
Bangladesh: ભારતના પાડોશી દેશ બાંગ્લાદેશમાં લઘુમતી હિન્દુ સમુદાય પર સતત અત્યાચાર થઈ રહ્યો છે. મંદિરોમાં તોડફોડ કરવામાં આવી રહી છે અને હિન્દુ લોકોના ઘરોને પણ આગ લગાડવામાં આવી રહી છે. બાંગ્લાદેશ પોલીસે શનિવારે સુનમગંજ જિલ્લાના દોરાબજાર વિસ્તારમાં હિન્દુ મંદિરમાં તોડફોડ કરવા અને ઘરો અને દુકાનોને આગ લગાડવા બદલ ચાર લોકોની ધરપકડ કરી હતી.
ધરપકડ કરાયેલા લોકોમાં 19 વર્ષીય અલીમ હુસૈન, 20 વર્ષીય સુલતાન અહેમદ રાજુ, 31 વર્ષીય ઈમરાન હુસૈન અને 20 વર્ષીય શઝાન હુસૈનનો સમાવેશ થાય છે. ધરપકડ કરાયેલા લોકો ઉપરાંત પોલીસે 12 નામના વ્યક્તિઓ અને 150-170 અજાણ્યા લોકો સામે પણ કેસ નોંધ્યો છે. પોલીસે એમ પણ કહ્યું કે તેઓ આ કેસ સાથે જોડાયેલા અન્ય લોકોની ઓળખ કરવા માટે પણ તપાસ કરી રહ્યા છે.
જ્યારથી બાંગ્લાદેશમાં શેખ હસીનાની સરકાર ઉથલાવી દેવામાં આવી છે ત્યારથી હિન્દુ સમુદાય વિરુદ્ધ હિંસાની ઘટનાઓ સામે આવી રહી છે. મંદિરો પર હુમલાની સાથે લોકોના ઘરોમાં તોડફોડ અને આગચંપી જેવી ઘટનાઓ પણ બની રહી છે. ત્યારથી ભારત પણ બાંગ્લાદેશમાં થઈ રહેલી હિંસા અંગે સતત અવાજ ઉઠાવી રહ્યું છે. હાલમાં જ બાંગ્લાદેશમાં ઈસ્કોનના પૂજારી ચિન્મય કૃષ્ણ દાસની પણ રાજદ્રોહના આરોપમાં અટકાયત કરવામાં આવી છે. જેના કારણે હિન્દુ સમુદાયમાં ભારે રોષ જોવા મળી રહ્યો છે. આ તમામ બાબતોના કારણે બાંગ્લાદેશ અને ભારત વચ્ચેના સંબંધોમાં તણાવ ઉભો થયો છે.
આ પણ વાંચો: શેખ હસીનાની વધી મુશ્કેલીઓ… બાંગ્લાદેશમાં લોકોને બળજબરીથી ગાયબ કરવાનો લાગ્યો આરોપ
બાંગ્લાદેશે મંગળવારે લઘુમતીઓ સામે સાંપ્રદાયિક હિંસાની 88 ઘટનાઓ સ્વીકારી છે. દેશે એમ પણ કહ્યું છે કે તે ઘટનાઓમાં 70 લોકોની ધરપકડ કરવામાં આવી છે. દેશની વચગાળાની સરકારના મુખ્ય સલાહકાર મોહમ્મદ યુનુસના પ્રેસ સચિવ શફીકુલ આલમે જણાવ્યું કે 5 ઓગસ્ટથી 22 ઓક્ટોબર સુધી કુલ 88 કેસ નોંધાયા છે.
