બીજેપીની વધુ એક યાદી બહાર પડી, કિરણ ખેરની ટિકિટ કપાઈ

BJP Candidates List: ભારતીય જનતા પાર્ટીએ લોકસભા ચૂંટણી માટે ઉમેદવારોની 10મી યાદી જાહેર કરી છે. આ યાદીમાં નવ ઉમેદવારોની જાહેરાત કરવામાં આવી છે. ચંદીગઢ ઉપરાંત ઉત્તર પ્રદેશ અને પશ્ચિમ બંગાળની આસનસોલની સાત લોકસભા બેઠકો માટે ઉમેદવારોની જાહેરાત કરવામાં આવી છે.

કિરણ ખેરની ટિકિટ કપાઇ
ચંદીગઢથી વર્તમાન સાંસદ કિરણ ખેરની ટિકિટ રદ કરવામાં આવી છે. અહીંથી પાર્ટીએ તેમના સ્થાને સંજય ટંડન પર વિશ્વાસ વ્યક્ત કર્યો છે. ટંડન ચંદીગઢ ભાજપના અધ્યક્ષ રહી ચૂક્યા છે. આ સિવાય પૂર્વ કેન્દ્રીય મંત્રી એસએસ અહલુવાલિયાને આસનસોલથી ઉમેદવાર બનાવવામાં આવ્યા છે. આ પહેલા પાર્ટીએ ભોજપુરી અભિનેતા પવન સિંહને ટિકિટ આપી હતી. ટિકિટ મળ્યાના 24 કલાકમાં પવન સિંહ ચૂંટણી મેદાનમાંથી હટી ગયા હતા. અહલુવાલિયાનો મુકાબલો ટીએમસી સાંસદ શત્રુઘ્ન સિંહા સાથે થશે. અહલુવાલિયા છેલ્લી લોકસભા ચૂંટણીમાં રાજ્યની બર્ધમાન દુર્ગાપુર બેઠક પરથી જીત્યા હતા. આ વખતે ભાજપે પૂર્વ પ્રદેશ અધ્યક્ષ દિલીપ ઘોષને ટિકિટ આપી છે.

યુપીના સાત ઉમેદવારોની જાહેરાત
યાદીમાં સાત ઉમેદવારો ઉત્તર પ્રદેશના છે. જયવીર સિંહ સપા પ્રમુખ અખિલેશ યાદવની પત્ની ડિમ્પલ યાદવ સામે ભાજપના ઉમેદવાર હશે. આ સિવાય પાર્ટીએ બલિયાથી નીરજ શેખરને પોતાના ઉમેદવાર બનાવ્યા છે. શેખર પૂર્વ વડાપ્રધાન ચંદ્રશેખરના પુત્ર છે અને હાલમાં રાજ્યસભાના સાંસદ છે. અહીંથી વર્તમાન સાંસદ વીરેન્દ્ર સિંહ મસ્તની ટિકિટ રદ્દ કરવામાં આવી છે.

પ્રયાગરાજના બંને સાંસદોની ટિકિટ કેન્સલ
પ્રયાગરાજ જિલ્લાની બંને બેઠકો પર ઉમેદવારો બદલવામાં આવ્યા છે. વર્તમાન સાંસદ રીટા બહુગુણા જોશી અને કેસરી દેવી પટેલને ટિકિટ આપવામાં આવી નથી. અલ્હાબાદ સીટ પરથી નીરજ ત્રિપાઠીને તક આપવામાં આવી છે. નીરજ ભાજપના દિગ્ગજ નેતા કેશરીનાથ ત્રિપાઠીના પુત્ર છે. કેશરીનાથ પૂર્વ રાજ્યપાલ અને યુપી વિધાનસભાના અધ્યક્ષ હતા. જિલ્લાની ફુલપુર લોકસભા બેઠક પરથી પ્રવીણ પટેલને ઉમેદવાર બનાવવામાં આવ્યા છે. પ્રવીણ હાલમાં ફુલપુરથી ધારાસભ્ય છે.

અફઝલ સામે પારસનાથ
પાર્ટીએ ફરી એકવાર કૌશામ્બી લોકસભા સીટ પરથી વિનોદ સોનકરને ટિકિટ આપી છે. સોનકર અહીંથી વર્તમાન સાંસદ છે. આ સિવાય વર્તમાન સાંસદ બીપી સરોજને માછલીશહરથી મેદાનમાં ઉતારવામાં આવ્યા છે. બીજેપીએ ગાઝીપુર સીટ પરથી પારસ નાથ રાયને ઉમેદવાર બનાવ્યા છે. પારસનો મુકાબલો અફઝલ અંસારી સાથે થશે, જે 2019માં બસપાની ટિકિટ પર જીત્યા હતા, આ વખતે અફઝલ અહીંથી સપાની ટિકિટ પર ચૂંટણી લડી રહ્યા છે.