ધાનેરામાં ઇન્સ્ટાગ્રામ આઇડી મામલે હુમલો, પાંચનું ટોળું બે લોકો પર તૂટી પડ્યું
રતનસિંહ ઠાકોર, બનાસકાંઠાઃ અનેક વખત સોશિયલ મીડિયા બબાલનું કારણ બનતું હોય છે. ત્યારે ધાનેરાના વાલેર ગામમાં પણ આવી જ એક ઘટના બની છે. જેમાં ઇન્સ્ટાગ્રામ આઇડીને કારણે હુમલો કરવામાં આવ્યો છે.
મળતી માહિતી પ્રમાણે, ધાનેરાના વાલેર ગામે ઈન્સ્ટાગ્રામ આઇડીમાં સરનેમ લખવા બાબતે હીંચકારો હુમલો થયો છે. સાંજે 7 વાગે બસ સ્ટેન્ડ પાસે પાંચ લોકોએ ભેગા મળીને હુમલો કરતા બે લોકો ઈજાગસ્ત થયા છે. તેમને તાત્કાલિક સારવાર માટે ધાનેરા રેફરલ હોસ્પિટલમાં દાખલ કરવામાં આવ્યા છે.
આ પાંચ લોકો ભેગા મળીને બે લોકો પર તૂટી પડતા થોડીવાર માટે બસ સ્ટેન્ડ પાસે અફરાતફરીનો માહોલ સર્જાયો હતો. ઇજાગ્રસ્તને સારવાર અર્થે હોસ્પિટલ લાવવામાં આવતા લોકોનાં ટોળેટોળા ઉમટી પડ્યા હતા. આ મામલે ઇજાગ્રસ્તના પરિવારે પોલીસને જાણ કરી હતી. તો પોલીસે સમગ્ર મામલે પ્રાથમિક તપાસ હાથ ધરી ફરિયાદ નોંધવાની તજવીજ હાથ ધરી હતી.
