ચૂંટણી પહેલા ટ્રમ્પે ભારતીય વિદ્યાર્થીઓને કર્યા ખુશ, ગ્રીન કાર્ડ આપવાનો કર્યો વાયદો

US: અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પના ચૂંટણી પહેલાના વાયદાએ ભારતીય વિદ્યાર્થીઓને ખુશ કરી દીધા છે. તેમણે કહ્યું કે જો તેઓ સત્તામાં પાછા ફરશે તો અમેરિકામાં ગ્રેજ્યુએટ થયેલા વિદ્યાર્થીઓને ગ્રીન કાર્ડ આપવામાં આવશે. અમેરિકામાં અભ્યાસ કરી રહેલા વિદેશી વિદ્યાર્થીઓ માટે આ મોટી રાહતના સમાચાર છે. જોકે, રિપબ્લિકન નેતા ટ્રમ્પ ઈમિગ્રેશન નિયમો અંગે કડક વલણ અપનાવવા માટે જાણીતા છે. ટ્રમ્પના વચન મુજબ, જો તેમની સરકાર બનશે તો અમેરિકન કોલેજોમાં અભ્યાસ કરતા ભારતીય અને અન્ય વિદેશી વિદ્યાર્થીઓને આપોઆપ ગ્રીન કાર્ડ મળી જશે અને તેઓ અમેરિકામાં કાયમી રહેવા માટે હકદાર બનશે.

ડોનાલ્ડ ટ્રમ્પે કહ્યું કે અમેરિકન કોલેજોમાં ભણતા વિદ્યાર્થીઓ જ્યારે તેમના દેશમાં જાય છે ત્યારે તેઓ અબજોપતિ બની જાય છે. આવું જ કંઈક અમેરિકામાં પણ થઈ શકે છે. તમને જણાવી દઈએ કે અમેરિકી રાષ્ટ્રપતિની ચૂંટણી નવેમ્બરમાં યોજાઈ શકે છે. જો બાઇડેન અને ડોનાલ્ડ ટ્રમ્પ વચ્ચે ટક્કર થઈ શકે છે. ચૂંટણીમાં ગેરકાયદેસર ઇમિગ્રેશન અને દેશનિકાલનો મુદ્દો મહત્વનો છે.

એક પોડકાસ્ટ દરમિયાન ટ્રમ્પે કહ્યું કે અમેરિકન કોલેજોમાંથી સ્નાતક થયેલા વિદ્યાર્થીઓને ડિપ્લોમાના રૂપમાં ગ્રીન કાર્ડ આપવામાં આવશે. સિલિકોન વેલી ટેક ઈન્વેસ્ટર્સ દ્વારા આયોજિત પોડકાસ્ટમાં ડોનાલ્ડ ટ્રમ્પે કહ્યું કે તેઓ વિશ્વભરના સારા પ્રતિભાશાળી લોકોને અમેરિકામાં આમંત્રિત કરવાનો અધિકાર આપશે. સાથે જ ટ્રમ્પે કહ્યું કે જો કોઈ અમેરિકન કોલેજમાંથી ગ્રેજ્યુએટ થાય છે તો તેને ગ્રીન કાર્ડ મળવું જોઈએ. આમાં જુનિયર કોલેજોનો પણ સમાવેશ થાય છે.

આ પણ વાંચો: ‘બધાને હકીકત ખબર હતી…’, તનુશ્રીના લગાવેલા આરોપ પર નાના પાટેકરે તોડ્યું મૌન

તે સ્પષ્ટ નથી કે ડોનાલ્ડ ટ્રમ્પ એ લોકોનો ઉલ્લેખ કરી રહ્યા હતા કે જેઓ ગેરકાયદેસર રીતે અમેરિકામાં પ્રવેશ્યા છે. અથવા એવા લોકો કે જેમના વિઝા સમાપ્ત થઈ ગયા છે અને તેઓ અમેરિકામાં રહી રહ્યા છે. ટ્રમ્પે કહ્યું કે તેઓ ઇચ્છે છે કે કુશળ સ્નાતકો તેમના દેશમાં રહે અને વિકાસમાં યોગદાન આપે. માનવાધિકાર કાર્યકરોને ટ્રમ્પના વચનથી વિશ્વાસ નથી. તેમનું કહેવું છે કે ટ્રમ્પે જ અગાઉના વહીવટીતંત્રમાં સ્ટુડન્ટ વિઝા પર પ્રતિબંધ મૂક્યો હતો અને ગ્રેજ્યુએશન પછી તેમને અમેરિકાથી દેશનિકાલ કરવાની નીતિ અપનાવી હતી. અમેરિકન કંપનીઓમાં વિદેશીઓની નિમણૂક માટેના નિયમોને પણ મુશ્કેલ બનાવવામાં આવ્યા હતા.

ટ્રમ્પે કહ્યું, જો તમે કોલેજમાંથી બે વર્ષ કે ચાર વર્ષની ડિગ્રી લો છો. અથવા જો તમે ડોક્ટરલ ડિગ્રી લો છો, તો તમને અમેરિકામાં રહેવાનો અધિકાર મળવો જોઈએ. તેમણે કહ્યું કે ઘણા પ્રતિભાશાળી લોકો કંપનીઓની ઓફર સ્વીકારી શકતા નથી કારણ કે તેમને અમેરિકામાં રહેવાનો અધિકાર નથી મળતો.