CBSE 10મા ધોરણની બોર્ડ પરીક્ષા વર્ષમાં બે વાર લેશે, પહેલી પરિક્ષા ફેબ્રુઆરી-માર્ચમાં; બીજી મે મહિનામાં

CBSE: સેન્ટ્રલ બોર્ડ ઓફ સેકન્ડરી એજ્યુકેશન (CBSE)એ ધોરણ 10ના વિદ્યાર્થીઓ માટે તેની પરીક્ષા પ્રણાલીમાં મોટો સુધારો રજૂ કર્યો છે. બોર્ડના તાજેતરના નિર્ણય મુજબ 2026થી CBSE વર્ષમાં બે વાર ધોરણ 10ની બોર્ડ પરીક્ષાઓ લેશે, જેનાથી વિદ્યાર્થીઓને તેમના પ્રદર્શનમાં સુધારો કરવાની વધારાની તક મળશે.

બે તબક્કામાં પરીક્ષા લેવાશે
નવા મંજૂર કરાયેલા ડ્રાફ્ટ માર્ગદર્શિકા મુજબ ધોરણ 10ની બોર્ડ પરીક્ષાઓ બે તબક્કામાં લેવામાં આવશે. પહેલી પરિક્ષા ફેબ્રુઆરી અને માર્ચ વચ્ચે યોજાશે, જ્યારે બીજી પરીક્ષા મે મહિનામાં યોજાવાની છે. બંને પરીક્ષાઓ સમગ્ર અભ્યાસક્રમને આવરી લેશે, જે વિદ્યાર્થીઓના જ્ઞાન અને કુશળતાનું વ્યાપક મૂલ્યાંકન સુનિશ્ચિત કરશે.

• પહેલી પરિક્ષા – 17 ફેબ્રુઆરીથી 6 માર્ચ
• બીજી પરિક્ષા – 5થી 20 મે

વ્યવહારુ અને આંતરિક મૂલ્યાંકન વર્ષમાં ફક્ત એક જ વાર
નવા નિયમો અનુસાર, બોર્ડની પરીક્ષાઓ વર્ષમાં બે વાર લેવામાં આવશે. જ્યારે પ્રેક્ટિકલ અને આંતરિક મૂલ્યાંકન વર્ષમાં ફક્ત એક જ વાર લેવામાં આવશે.

આ નવી રચનાનો ઉદ્દેશ્ય વિદ્યાર્થીઓને વધુ સુગમતા પ્રદાન કરવાનો અને એક જ વાર્ષિક પરીક્ષા સાથે સંકળાયેલા દબાણને ઘટાડવાનો છે. વિદ્યાર્થીઓને બંને સત્રોમાં હાજર રહેવાની અને તેમની તૈયારી માટે સૌથી યોગ્ય સત્ર પસંદ કરવાની તક મળશે.

9મી સુધીમાં તમારો પ્રતિભાવ સબમિટ કરો.
ડ્રાફ્ટ ધોરણો હવે જાહેર ક્ષેત્રમાં મૂકવામાં આવશે અને હિસ્સેદારો 9 માર્ચ સુધી પોતાનો પ્રતિસાદ આપી શકે છે. ત્યાર બાદ નીતિને અંતિમ સ્વરૂપ આપવામાં આવશે. ડ્રાફ્ટ ધોરણો અનુસાર પરીક્ષાનો પ્રથમ તબક્કો 17 ફેબ્રુઆરીથી 6 માર્ચ દરમિયાન યોજાશે. જ્યારે બીજો તબક્કો 5થી 20 મે દરમિયાન યોજાશે.

બંને પરીક્ષાઓ સંપૂર્ણ અભ્યાસક્રમ પર લેવામાં આવશે અને ઉમેદવારોને બંને સંસ્કરણોમાં સમાન પરીક્ષા કેન્દ્રો ફાળવવામાં આવશે. બંને પરીક્ષાઓ માટેની પરીક્ષા ફી અરજી ફાઇલ કરતી વખતે વસૂલવામાં આવશે. બોર્ડ પરીક્ષાઓની પહેલી અને બીજી આવૃત્તિ પણ પૂરક પરીક્ષા તરીકે કાર્ય કરશે અને કોઈપણ સંજોગોમાં કોઈ ખાસ પરીક્ષા લેવામાં આવશે નહીં.

હાલમાં સિસ્ટમ શું છે?
હાલમાં, ધોરણ 10 અને 12ની બોર્ડ પરીક્ષાઓ ફેબ્રુઆરી અને માર્ચ વચ્ચે લેવામાં આવે છે. કોવિડ-19 મહામારી દરમિયાન CBSEએ એક વખતના બોર્ડ પરીક્ષાઓને બે સત્રોમાં વિભાજીત કરી હતી. જોકે, બોર્ડે બીજા વર્ષે પરંપરાગત વર્ષના અંતે પરીક્ષા ફોર્મેટ પાછું અપનાવ્યું.