કેદારનાથમાં ફરી ત્રાહિમામ… વરસાદના કારણે રસ્તાઓ તૂટ્યા, ફસાયેલા લોકોનું રેસ્ક્યુ ચાલુ
કેદારનાથ: મુશળધાર વરસાદે અનેક રાજ્યોમાં તબાહી મચાવી છે. ઉત્તરાખંડમાં મુશળધાર વરસાદને કારણે ભારે નુકસાન થઈ રહ્યું છે અને કેદારનાથ ધામ પહોંચતા શ્રદ્ધાળુઓને પણ ઘણી સમસ્યાઓનો સામનો કરવો પડી રહ્યો છે. અહીં ફસાયેલા શ્રદ્ધાળુઓને બહાર કાઢવાનું કામ પ્રશાસન દ્વારા ઝડપથી કરવામાં આવી રહ્યું છે. કેદારનાથમાં દુર્ઘટના બાદ ત્રીજા દિવસે પણ બચાવ કામગીરી ચાલુ છે. આજે સવારે 6 વાગ્યાથી શરૂ થયેલા બચાવ અભિયાનમાં લીંચોલીમાંથી 150 જેટલા લોકોને હેલી મારફત શેરસી હેલિપેડ પર મોકલવામાં આવ્યા હતા. એસડીઆરએફની ટીમ અને જિલ્લા પ્રશાસનની ટીમ સતત સર્ચ ઓપરેશન ચલાવી રહી છે. મોટી લિંચોલીથી છોટી લીંચોલી સુધીના કાટમાળમાં મૃતદેહોની શોધ કરવામાં આવી રહી છે.
પત્થરોમાં દટાયેલા મૃતદેહ મળ્યા
રેસ્ક્યુ સાઈટ થારુ કેમ્પ નજીકથી મોટા પથ્થરો નીચે દટાયેલા મૃતદેહને બહાર કાઢવામાં આવ્યો છે. જેમની પાસેથી બે મોબાઈલ ફોન અને અન્ય મુદ્દામાલ મળી આવ્યો છે. મૃતદેહની ઓળખ સહરપુરના રહેવાસી શુભમ કશ્યપ તરીકે થઈ છે. મૃતકનો મૃતદેહ અને રિકવર કરેલી સામગ્રી ચોકી લીંચોલીને સોંપવામાં આવી છે. છોટી લિંચોલીના થરુ કેમ્પમાં રેસ્ક્યુ ટીમ ગુમ થયેલા લોકોને શોધી રહી છે. તપાસ દરમિયાન થારૂ કેમ્પમાંથી એક મોબાઈલ મળી આવ્યો હતો જે ચોકી લીંચોલીને સોંપવામાં આવ્યો હતો.
ઉત્તરાખંડ પોલીસ હેડક્વાર્ટરએ જણાવ્યું કે કેદારનાથમાં બુધવારે રાત્રે ભારે વરસાદને કારણે ઘણા રસ્તાઓને નુકસાન થયું છે. જિલ્લા વહીવટીતંત્ર અને પોલીસ અને અન્ય સુરક્ષા દળો વિવિધ સ્થળોએ ફસાયેલા શ્રદ્ધાળુઓ અને સ્થાનિક લોકોને સુરક્ષિત રીતે બચાવવા માટે સતત કામ કરી રહ્યા છે. તમામ લોકોને સુરક્ષિત રીતે બચાવવા માટે દરેક સ્તરે પ્રયાસો કરવામાં આવી રહ્યા છે. બચાવ કામગીરી ઝડપી બનાવવા માટે મુસાફરોને એરફોર્સના ચિનૂક અને MI 17 એરક્રાફ્ટ દ્વારા એરલિફ્ટ કરવામાં આવ્યા હતા. મેન્યુઅલ બચાવ પણ સતત ચાલુ છે.
આ પણ વાંચો: પંજાબના CM ભગવંત નહીં જઈ શકે પેરિસ, વિદેશ મંત્રાલયે મંજૂરી ન આપી
આખા બે દિવસથી મોબાઈલ નેટવર્ક ડાઉન છે. નેટવર્ક કનેક્ટિવિટીની સમસ્યાને કારણે લગભગ 150 મુસાફરોને તેમના પરિવારના સભ્યોનો સંપર્ક કરવામાં સમસ્યાનો સામનો કરવો પડી રહ્યો છે. વિવિધ સ્થળોએ રોકાતા મુસાફરો માટે વહીવટી કક્ષાએ ભોજન, પાણી અને રહેવાની પૂરતી વ્યવસ્થા પણ કરવામાં આવી છે. 18 કિલોમીટર લાંબો વૉકિંગ પાથ લગભગ 13 જગ્યાએ તૂટી ગયો છે. આવી સ્થિતિમાં ચૌમાસીના વૈકલ્પિક માર્ગ દ્વારા બચાવ કામગીરી કરવામાં આવી રહી છે.
