લોકોને બળજબરીથી ગાયબ કરવામાં ભારત સામેલ.. બાંગ્લાદેશે લગાવ્યો નવો આરોપ

Bangladesh: બળજબરીથી ગુમ થવાના કેસોની તપાસ કરી રહેલા કમિશનના રિપોર્ટમાં દાવો કરવામાં આવ્યો છે. બાંગ્લાદેશની વચગાળાની સરકાર દ્વારા રચવામાં આવેલા કમિશને દાવો કર્યો છે કે પૂર્વ વડાપ્રધાન શેખ હસીનાના શાસનકાળ દરમિયાન બળજબરીથી ગુમ થવાની ઘટનાઓમાં ભારતની ભૂમિકા પણ સામે આવી છે. સરકારી સમાચાર એજન્સીએ શનિવારે પંચના અહેવાલ અનુસાર કહ્યું હતું કે, “બાંગ્લાદેશમાં બળજબરીથી ગાયબ થવાના કેસોમાં ભારતની સંડોવણી જાહેર રેકોર્ડની બાબત છે.”

રિપોર્ટમાં એમ પણ કહેવામાં આવ્યું છે કે સુપ્રીમ કોર્ટના નિવૃત્ત ન્યાયાધીશ મૈનુલ ઇસ્લામ ચૌધરીની આગેવાની હેઠળનું પાંચ સભ્યોનું પંચ માને છે કે કેટલાક કેદીઓ હજુ પણ ભારતીય જેલોમાં બંધ છે. કમિશને કહ્યું, “અમે વિદેશ અને ગૃહ મંત્રાલયોને સલાહ આપીએ છીએ કે તેઓ ભારતમાં જેલમાં બંધ બાંગ્લાદેશી નાગરિકની ઓળખ માટે તેમના શ્રેષ્ઠ પ્રયાસો કરે. “આ મામલાની બાંગ્લાદેશની બહાર તપાસ કરવી કમિશનના અધિકારક્ષેત્રની બહાર છે.”

3500 થી વધુ લોકોને બળજબરીથી ગાયબ કરવામાં આવ્યા હતા
ગયા અઠવાડિયે, પાંચ સભ્યોના પંચે મુખ્ય સલાહકાર પ્રોફેસર મોહમ્મદ યુનુસને ‘અનફોલ્ડિંગ ધ ટ્રુથ’ નામનો વચગાળાનો અહેવાલ સુપરત કર્યો હતો. આ રિપોર્ટમાં અંદાજ છે કે 3500થી વધુ લોકોને બળજબરીથી ગાયબ કરવામાં આવ્યા છે. આ કમિશનમાં જસ્ટિસ ફરીદ અહમદ શિબલી, માનવાધિકાર કાર્યકર્તા નૂર ખાન, ખાનગી BRAC યુનિવર્સિટીના શિક્ષક નબીલા ઇદ્રિસ અને માનવાધિકાર કાર્યકર્તા સજ્જાદ હુસૈનનો સમાવેશ થાય છે.