બંગાળમાં નર્સની છેડતી, બોટલ ચડાવતી વખતે દર્દીએ અડપલા કર્યા
Bengal Nurse: પશ્ચિમ બંગાળના કોલકાતાની આરજી કર હોસ્પિટલમાં એક મહિલા ટ્રેઇની ડોક્ટર પર બળાત્કાર અને હત્યાની ઘટનાએ સમગ્ર દેશમાં આક્રોશ છે. દેશભરમાં વિરોધ પ્રદર્શન થઈ રહ્યા છે અને આરોપીઓ સામે કડક સજાની માંગ કરવામાં આવી રહી છે. આ દરમિયાન, બીરભૂમ જિલ્લામાં એક સરકારી હોસ્પિટલમાં ફરજ પરની નર્સની છેડતીનો મામલો સામે આવ્યો છે. અહીં દર્દીએ નર્સને બાટલો ચડાવતી વખતે તેની સાથે છેડતી કરી હતી. આરોપીની ધરપકડ કરવામાં આવી છે. આરોપીને ખૂબ તાવ આવતાં તેને સ્ટ્રેચર પર હોસ્પિટલમાં લાવવામાં આવ્યો હતો. નર્સે આરોપી વિશે પોલીસમાં ફરિયાદ કરી, ત્યારબાદ કાર્યવાહી કરવામાં આવી.
નર્સે પોલીસને આપેલી ફરિયાદ મુજબ, જ્યારે તે દર્દીની સંભાળ લઈ રહી હતી ત્યારે દર્દીએ તેને અયોગ્ય રીતે સ્પર્શ કર્યો હતો. નર્સે વધુમાં આરોપ લગાવ્યો હતો કે દર્દીએ માત્ર તેને અયોગ્ય રીતે સ્પર્શ કર્યો ન હતો પરંતુ તેના પ્રત્યે આપત્તિજનક ભાષાનો પણ ઉપયોગ કર્યો હતો. હોસ્પિટલ પ્રશાસને તરત જ પોલીસને બોલાવી, જે ઘટનાસ્થળે પહોંચી અને આરોપીની ધરપકડ કરી. ઇલામબજાર પોલીસ સ્ટેશનમાં ઔપચારિક લેખિત ફરિયાદ દાખલ કરવામાં આવી છે અને હવે તપાસ ચાલી રહી છે.
આ પણ વાંચો: બાંગ્લાદેશમાં હિંદુ શિક્ષકો પાસે બળજબરીથી રાજીનામા લેવાયા
નર્સે કહ્યું- શું શું થયું હતું?
ઘટનાને યાદ કરતાં નર્સે કહ્યું, “નાઇટ શિફ્ટમાં એક પુરુષ દર્દીને તાવની ફરિયાદ સાથે લાવવામાં આવ્યો હતો. ડૉક્ટરોની સલાહ મુજબ, હું તેને ડ્રિપ લગાવવાની તૈયારી કરી રહ્યી હતી ત્યારે તેણે ખરાબ વર્તન કરવાનું શરૂ કર્યું. તેણે મને સ્પર્શ કર્યો અને અપશબ્દોનો ઉપયોગ કર્યો. સુરક્ષાના અભાવે અમે અહીં કામ કરવા માટે અસુરક્ષિત અનુભવીએ છીએ. દર્દી આવું કેવી રીતે વર્તન કરી શકે?”
ઘટનાની રાત્રે આરોગ્ય કેન્દ્રમાં ફરજ બજાવતા ડો. મસીદુલ હસને વિગતવાર માહિતી આપતાં જણાવ્યું હતું કે, અબ્બાસ ઉદ્દીન નામનો દર્દી છોટોચક ગામમાંથી રાત્રે 8.30 વાગ્યે તાવ સાથે આવ્યો હતો. આવતાની સાથે જ તેણે ગેરવર્તન શરૂ કર્યું. થોડી તપાસ પછી, અમે તેને ઈન્જેક્શન અને IV પ્રવાહી આપવાની સલાહ આપી. જ્યારે નર્સ સલાઈન લગાવવા ગઈ ત્યારે દર્દીએ હિંસક વર્તન કર્યું અને તેને અયોગ્ય રીતે સ્પર્શ કરીને તેની છેડતી કરી. અમે દર્દીના પરિવારજનોને સહકાર આપવા વિનંતી કરી હતી, પરંતુ દર્દીએ ખરાબ વર્તન કરવાનું ચાલુ રાખ્યું હતું. અમે આ ઘટના અંગે પોલીસ અને સત્તાવાળાઓને જાણ કરી છે. જો કોઈ પગલાં લેવામાં નહીં આવે, તો અમે કામ બંધ કરવાનું વિચારીશું.”
નોંધનીય છે કે આ ઘટના કોલકાતાની સરકારી આરજી કાર હોસ્પિટલમાં તાલીમાર્થી ડોક્ટર સાથે બળાત્કાર અને હત્યાના થોડા અઠવાડિયા પછી બની છે. આ ગુનામાં બીજા દિવસે મુખ્ય આરોપી સંજય રોયની ધરપકડ કરવામાં આવી હતી. તાલીમાર્થી ડૉક્ટરના કેસને હેન્ડલ કરવા બદલ કોલકાતા પોલીસ અને હોસ્પિટલ પ્રશાસનની ટીકા કરવામાં આવી હતી. આ કેસની તપાસ હવે સીબીઆઈ કરી રહી છે.
