દિલ્હીમાં કેન્દ્ર સરકારના કર્મચારીઓના ઓફિસ આવવાના સમયમાં ફેરફાર, આદેશ જારી

Air pollution: દિલ્હીમાં વાયુ પ્રદૂષણની સ્થિતિ અત્યંત ખરાબ સ્તરે પહોંચી ગઈ છે. પ્રદૂષણને જોતા કેન્દ્ર સરકારે ગુરુવારે પોતાના કર્મચારીઓના કામકાજના સમયમાં ફેરફાર કર્યો છે. કેન્દ્રીય કર્મચારી મંત્રાલયે એક નિવેદન જારી કરીને કહ્યું કે સરકારી કચેરીઓ સવારે 9 થી સાંજના 5.30 અને સવારે 10 થી સાંજના 6.30 સુધી ખુલ્લી રહી શકશે. આદેશમાં એમ પણ કહેવામાં આવ્યું છે કે કર્મચારીઓ હાઇબ્રિડ વાહનોનો ઉપયોગ કરી શકે છે અને પ્રદૂષણ ઘટાડવા માટે જાહેર પરિવહનનો ઉપયોગ કરી શકે છે.

દિલ્હી સરકાર પહેલાથી જ જાહેરાત કરી ચૂકી છે
આ પહેલા દિલ્હી સરકારે બુધવારે જાહેરાત કરી હતી કે હવે સરકારી ઓફિસોમાં 50 ટકા કર્મચારીઓ ઘરેથી કામ કરશે અને 50 ટકા ઓફિસમાં આવશે. રાજધાનીમાં પ્રદૂષણનું સ્તર વધી રહ્યું હોવાથી સરકાર દ્વારા વસ્તુઓ પર નિયંત્રણો લાદવામાં આવી રહ્યા છે. ગ્રૈપ-4નો અમલ થઈ ચૂક્યો છે. શાળા-કોલેજો બંધ કરી દેવામાં આવી છે. હવે કર્મચારીઓના સ્વાસ્થ્યને ધ્યાનમાં રાખીને તેમને ઘરેથી કામ કરવા માટે કહેવામાં આવ્યું છે.