કંગના રનૌતની ફિલ્મ ‘ઈમરજન્સી’ની રિલીઝ પર જલદી લેવાય નિર્ણય, બોમ્બે હાઈકોર્ટે CBFCને લગાની ફટકાર
મુંબઈ: ફિલ્મ અભિનેત્રી અને બીજેપી સાંસદ કંગના રનૌતની તાજેતરની ફિલ્મ ઈમરજન્સીની રિલીઝને લઈને આજે બોમ્બે હાઈકોર્ટમાં કોઈ નિર્ણય લઈ શકાયો ન હતો. પરંતુ હાઈકોર્ટે સેન્ટ્રલ બોર્ડ ઓફ ફિલ્મ સર્ટિફિકેશનને સખત ઠપકો આપ્યો છે. કોર્ટે સીબીએફસીને 25 સપ્ટેમ્બર સુધીમાં ઈમરજન્સી સર્ટિફિકેટ અંગે નિર્ણય લેવા જણાવ્યું છે. કડક ટિપ્પણી કરતા કોર્ટે કહ્યું કે અવ્યવસ્થાની આશંકાને કારણે કોઈની રચનાત્મક સ્વતંત્રતા પર અંકુશ લગાવી શકાય નહીં.
હાઈકોર્ટે કહ્યું કે અભિવ્યક્તિની સ્વતંત્રતા પર કોઈ પ્રતિબંધ ન હોવો જોઈએ. બોર્ડ ફિલ્મને પ્રમાણપત્ર આપવાનો ઇનકાર કરી શકે નહીં કારણ કે તેનાથી કાયદો અને વ્યવસ્થાની સમસ્યા ઊભી થઈ શકે છે. કોર્ટે એમ પણ કહ્યું હતું કે આખી ફિલ્મ જોયા વિના કેવી રીતે કહી શકાય કે તેનાથી અરાજકતા ફેલાઈ શકે છે.
CBFCના વલણ પર કોર્ટની નારાજગી
જસ્ટિસ બીપી કોલાબાવાલા અને જસ્ટિસ ફિરદોશ પૂનીવાલાની ડિવિઝન બેન્ચે સીબીએફસીને પણ પૂછ્યું કે શું તેને લાગે છે કે આ દેશના લોકો એટલા નિર્દોષ છે કે તેઓ ફિલ્મમાં બતાવવામાં આવેલી દરેક વાત માને છે. કોર્ટે સેન્ટ્રલ બોર્ડ ઓફ ફિલ્મ સર્ટિફિકેશનના આ વલણ પર કડક સૂરમાં નારાજગી વ્યક્ત કરી અને કહ્યું કે ફિલ્મને સર્ટિફિકેટ આપવા અંગેનો નિર્ણય 25 સપ્ટેમ્બર સુધીમાં લેવામાં આવે.
શું શાસક પક્ષ તેના સાંસદ વિરુદ્ધ છે?- કોર્ટ
જોકે, બોર્ડે કહ્યું કે ફિલ્મની અસરનું મૂલ્યાંકન કરવાનું બાકી છે. જ્યારે અરજદાર વતી કોર્ટમાં કહેવામાં આવ્યું કે સીબીએફસી રાજકીય કારણોસર ફિલ્મને પ્રમાણપત્ર આપવામાં વિલંબ કરી રહી છે. તેના પર કોર્ટે કહ્યું- આશ્ચર્યની વાત છે કે ફિલ્મના નિર્માતા પોતે ભાજપના સાંસદ છે. તો શું સત્તાધારી પાર્ટી પોતાના જ સાંસદ વિરુદ્ધ છે?
આ પણ વાંચો: ‘પેલેસ્ટાઈનને સ્વતંત્ર રાજ્ય બનાવ્યા બાદ જ…’, સાઉદી ક્રાઉન પ્રિન્સે ઈઝરાયલને આપ્યું અલ્ટીમેટમ
શીખ સમુદાયે ફિલ્મ સામે વાંધો વ્યક્ત કર્યો હતો
ઝી એન્ટરટેઈનમેન્ટ એન્ટરપ્રાઈઝ દ્વારા ફિલ્મ ઈમરજન્સીને ઝડપથી પ્રમાણપત્ર આપવા માટે અરજી કરવામાં આવી હતી. ઝી એન્ટરટેનમેન્ટે તેની અરજીમાં દાવો કર્યો છે કે સીબીએફસીએ ફિલ્મનું પ્રમાણપત્ર તો બનાવી દીધું હતું પરંતુ તેને જારી કર્યું ન હતું.
કંગના રનૌત ઈમરજન્સીમાં પૂર્વ વડાપ્રધાન ઈન્દિરા ગાંધીની મુખ્ય ભૂમિકા ભજવી રહી છે. તેણે આ ફિલ્મનું દિગ્દર્શન કર્યું છે અને તે સહ-નિર્માતા પણ છે. કંગનાએ એવો પણ આરોપ લગાવ્યો હતો કે તેની મહત્વકાંક્ષી ફિલ્મને જાણી જોઈને રોકવામાં આવી હતી. આ ફિલ્મ અગાઉ 6 સપ્ટેમ્બરે રિલીઝ થવાની હતી પરંતુ શિરોમણી અકાલી દળ સહિત શીખ સંગઠનો દ્વારા વાંધો ઉઠાવવામાં આવ્યા બાદ તે વિવાદમાં ફસાઈ ગઈ હતી.
