દિલ્હી-NCRમાં તોફાન, ઘણી જગ્યાએ ઝાડ ધરાશાયી; બિલ્ડિંગને પણ નુકશાન
દિલ્હીઃ છેલ્લા ઘણા દિવસોથી ગરમીનો સામનો કરી રહેલા દિલ્હી-NCRમાં શુક્રવારે સાંજે જોરદાર વાવાઝોડું અને વરસાદ જોવા મળ્યો હતો. ધૂળની ડમરીના કારણે લોકોને ભારે મુશ્કેલીનો સામનો કરવો પડ્યો હતો. જેના કારણે ખાસ કરીને રાહદારીઓ અને ટુ-વ્હીલર ચાલકોને ભારે હાલાકીનો સામનો કરવો પડ્યો હતો. અનેક જગ્યાએ વૃક્ષો ધરાશાયી થઈ ગયા હતા, જેના કારણે લાંબો ટ્રાફિક જામ થયો હતો. વાવાઝોડાના કારણે વૃક્ષો ધરાશાયી થતાં છ લોકો ઘાયલ થયા હતા અને બેના મોત થયા હતા. ઘણી જગ્યાએ ઇમારતોને નુકસાન થયું હતું, જેમાં 17 લોકો ઘાયલ થયા હતા.
સાઈન બોર્ડ એમ્બ્યુલન્સ પર પડ્યું, કોઈને ઈજા થઈ નથી
આ દરમિયાન પશ્ચિમ દિલ્હીમાં આવેલા જોરદાર તોફાન બાદ દ્વારકા વળાંક પર સાઈન બોર્ડ એમ્બ્યુલન્સ પર પડ્યું હતું. આ સાઈન બોર્ડને કારણે કેટલાક નાના વાહનો પણ અથડાયા હતા. રાહતની વાત એ છે કે, આ ઘટનામાં કોઈને ઈજા થઈ નથી. ઘટના બાદ તરત જ દર્દીને અન્ય વાહનમાં હોસ્પિટલ મોકલવામાં આવ્યો હતો.
રાષ્ટ્રીય રાજધાની અને આસપાસના વિસ્તારોમાં જોરદાર પવનને કારણે નોઈડાના સેક્ટર 58માં એક ઈમારતના સમારકામ માટે લગાવવામાં આવેલું શટરિંગ તૂટી પડ્યું, જેના કારણે અનેક કારને નુકસાન થયું.
આજે અને આવતીકાલે હળવા વરસાદની સંભાવના
રાજધાનીમાં શનિવાર અને રવિવારે વરસાદ માટે યલો એલર્ટ જાહેર કરવામાં આવ્યું છે. શનિવારે 30થી 40 કિલોમીટર પ્રતિ કલાકની ઝડપે પવન ફૂંકાવા સાથે ધૂળનું તોફાન રહેશે. તેમજ હળવા વરસાદની સંભાવના છે. જેના કારણે મહત્તમ તાપમાન 39 ડિગ્રી સેલ્સિયસ રહી શકે છે. જો કે, લઘુત્તમ તાપમાન પણ વધીને 29 ડિગ્રી સેલ્સિયસ સુધી પહોંચે તેવી શક્યતા છે. જો વરસાદ પડશે તો તે મે મહિનાનું પહેલું વેસ્ટર્ન ડિસ્ટર્બન્સ હશે.
અહીં શુક્રવારે સવારથી જ તડકો હતો. બપોરના સમયે કાળઝાળ ગરમીએ લોકોને પરેશાન કરી દીધા હતા. આ સમયગાળા દરમિયાન મહત્તમ તાપમાન 39 ડિગ્રી સેલ્સિયસ હતું, જ્યારે લઘુત્તમ તાપમાન 27.7 ડિગ્રી સેલ્સિયસ હતું. જે સામાન્ય કરતાં ત્રણ ડિગ્રી વધુ હતુ. હવામાન વિભાગના જણાવ્યા અનુસાર, નરેલા વિસ્તાર સૌથી વધુ ગરમ રહ્યો હતો. અહીં મહત્તમ તાપમાન 40.9 ડિગ્રી સેલ્સિયસ નોંધાયું હતું. જાફરપુરમાં મહત્તમ તાપમાન 40.1 ડિગ્રી સેલ્સિયસ, નજફગઢમાં 40.3, પુસામાં 39.2, સ્પોર્ટ્સ કોમ્પ્લેક્સમાં 39.1 ડિગ્રી સેલ્સિયસ નોંધાયું હતું.
