ડોક્ટરોની મોટી માંગ સામે મમતા સરકાર ઝુકી, કોલકાતા પોલીસ કમિશનર બદલાયા
Manoj Kumar Verma: ડોકટરોની વધતી માંગ અને અસંતોષ વચ્ચે મમતા બેનર્જીની સરકારે કોલકાતા પોલીસમાં મોટો ફેરફાર કર્યો છે. સરકારે પોલીસ કમિશનર વિનીત ગોયલને તેમના પદ પરથી હટાવીને તેમના સ્થાને મનોજ કુમાર વર્માને નવા પોલીસ કમિશનર તરીકે નિયુક્ત કર્યા છે. મનોજ કુમાર વર્મા 1998 બેચના IPS અધિકારી છે અને હાલમાં રાજ્ય પોલીસના ADG (કાયદો અને વ્યવસ્થા) તરીકે ફરજ બજાવતા હતા. તેમનો જન્મ 1968માં રાજસ્થાનના સવાઈ માધોપુરમાં થયો હતો. જાહેર સેવામાં પસંદગી થયા બાદ તેમણે અનેક મહત્વના પદો પર સેવા આપી છે.
Manoj Kumar Verma to be the new Kolkata Police Commissioner; Vineet Kumar Goyal transferred and posted as ADG & IGP, STF, West Bengal pic.twitter.com/6meNjBFlHd
— ANI (@ANI) September 17, 2024
મનોજ કુમાર વર્માએ તેમના કાર્યકાળ દરમિયાન કોલકાતા પોલીસમાં એડિશનલ કમિશનર તરીકે પણ સેવા આપી છે. આ ઉપરાંત, તેમણે DCI (સ્પેશિયલ), DCI (ટ્રાફિક) જેવા મહત્વના પદો પર પણ સેવા આપી છે. વધુમાં, વર્માએ પશ્ચિમ મિદનાપુરના પોલીસ અધિક્ષક તરીકે માઓવાદી પ્રવૃત્તિઓને નિયંત્રિત કરવામાં મહત્વની ભૂમિકા ભજવી હતી.
મનોજ કુમાર વર્માને 2017માં સિલિગુડી પોલીસ કમિશનરેટ અને દાર્જિલિંગના IG તરીકે નિયુક્ત કરવામાં આવ્યા હતા, જ્યાં તેમણે સફળતાપૂર્વક કાયદો અને વ્યવસ્થા જાળવી રાખી હતી. તેમના કાર્યો માટે તેમને 2017માં રાજ્ય સરકારનો પોલીસ મેડલ અને 2019માં મુખ્યમંત્રીનો પોલીસ મેડલ એનાયત કરવામાં આવ્યો હતો.
જો કે કોલકાતા પોલીસ કમિશનરના પદ માટે કેટલાક અન્ય અધિકારીઓના નામ પણ ચર્ચામાં હતા, પરંતુ અંતે મનોજ કુમાર વર્માની પસંદગી કરવામાં આવી. વિનીત ગોયલ, જેઓ અત્યાર સુધી કોલકાતા પોલીસ કમિશનરનું પદ સંભાળતા હતા, તેમને ADG (STF)ના પદ પર મોકલવામાં આવ્યા છે.આ સાથે રાજ્ય અને કોલકાતા પોલીસની અન્ય ઘણી પોસ્ટમાં પણ ફેરફાર કરવામાં આવ્યા છે.
