ધનતેરસ પર દેશભરમાં થશે અંદાજે 60 હજાર કરોડ રૂપિયાની ખરીદી, સોના-ચાંદીનું ધૂમ વેચાણ
Dhanteras 2024: દિવાળીના તહેવારોની સિઝનમાં મૂળભૂત રીતે આજનો ધનતેરસનો તહેવાર દેશભરના વેપારીઓ માટે ધંધામાં વેચાણનો મોટો દિવસ છે. આજના દિવસ માટે દેશભરના વેપારીઓએ મોટા પ્રમાણમાં તૈયારીઓ કરી છે. કોન્ફેડરેશન ઓફ ઓલ ઈન્ડિયા ટ્રેડર્સ (CAT)ના રાષ્ટ્રીય મહાસચિવ અને ચાંદની ચોકના સાંસદ પ્રવીણ ખંડેલવાલે જણાવ્યું કે આવતીકાલે અને આજે ધનતેરસના અવસર પર દેશભરમાં 50 હજાર કરોડ રૂપિયાનો છૂટક વેપાર થવાનો અંદાજ છે. બીજી તરફ, આ દિવાળીએ વોકલ ફોર લોકલની બોલબાલા બજારોમાં જોવા મળી રહી છે. કારણ કે લગભગ તમામ ખરીદી ભારતીય સમાનની જ થઈ રહી છે. એક અનુમાન મુજબ, દિવાળીને લગતા ચાઈનીઝ સામાનનું વેચાણ ન થવાને કારણે ચીનને લગભગ 1 લાખ 25 હજાર કરોડ રૂપિયાના બિઝનેસનું નુકસાન થયું છે.
સાંસદ ખંડેલવાલ આવતીકાલે ચાંદની ચોક ખાતે ભાજપના કાર્યકરો અને વેપારી આગેવાનો સાથે માટીના દીવા, માટીની સજાવટની વસ્તુઓ અને અન્ય ભારતીય વસ્તુઓની ખરીદી કરીને સ્થાનિક ઝુંબેશને મજબૂત બનાવશે, જ્યારે CAITના દિલ્હી સહિત અન્ય રાજ્યોના વેપારી આગેવાનો પોતપોતાના શહેરોમાં કુંભારો અને સ્થાનિક કારીગરો દ્વારા બનાવવામાં આવેલ સામાન ખરીદશે.
સાંસદ ખંડેલવાલે જણાવ્યું કે ધનતેરસના દિવસે સિદ્ધિ વિનાયક શ્રી ગણેશ જી, ધનના દેવી શ્રી મહાલક્ષ્મીજી અને શ્રી કુબેર ભગવાનની પૂજા કરવામાં આવે છે. આજના દિવસે નવી વસ્તુઓની ખરીદી કરવી શુભ માનવામાં આવે છે. આજના દિવસે ખાસ કરીને સોના-ચાંદીના આભૂષણો અને અન્ય વસ્તુઓ, જેમ કે તમામ પ્રકારના વાસણો, રસોડાનો સામાન, વાહનો, કપડાં અને તૈયાર વસ્ત્રો, ઈલેક્ટ્રોનિક્સ, ઈલેક્ટ્રીકલ સામાન અને ઉપકરણો, વ્યવસાયિક સાધનો જેવા કે કોમ્પ્યુટર અને કોમ્પ્યુટર સંબંધિત સાધનો, મોબાઈલ, વહી ખાતા, ફર્નિચર, એકાઉન્ટિંગનો સામાન વગેરે ખરીદવામાં આવે છે. પ્રાચીન માન્યતા અનુસાર ધનતેરસના દિવસે સાવરણી પણ ખરીદવામાં આવે છે.
તો, આજના ધનતેરસના દિવસે દેશભરમાં 20 હજાર કરોડ રૂપિયાનું સોનું અને 2500 કરોડ રૂપિયાની ચાંદીની ખરીદી થઈ હતી. જ્વેલરી ક્ષેત્રની CAT સંસ્થા ઓલ ઈન્ડિયા જ્વેલર્સ એન્ડ ગોલ્ડસ્મિથ ફેડરેશન (AIJGF)ના રાષ્ટ્રીય અધ્યક્ષ પંકજ અરોરાએ જણાવ્યું કે ધનતેરસ પર સમગ્ર દેશમાં સોના અને ચાંદીનું ધૂમ વેચાણ થયું. તેમણે કહ્યું કે આ વર્ષે ધનતેરસ પર સોના-ચાંદીના વેચાણમાં વધારો થયો છે. દેશમાં લગભગ ચાર લાખ નાના-મોટા જ્વેલર્સ કામ કરે છે.
બ્યુરો ઓફ ઈન્ડિયન સ્ટાન્ડર્ડ્સમાં 2 લાખ જ્વેલર્સ નોંધાયેલા છે જેમણે આજે રૂ. 20 હજાર કરોડનું આશરે 25 ટન સોનાનું વેચાણ કર્યું. આ જ રીતે દેશભરમાં 250 ટન ચાંદીનું વેચાણ થયું જેની કિંમત આશરે રૂ. 2,500 કરોડ રૂપિયા છે. ગયા વર્ષે સોનાનો ભાવ 10 ગ્રામ દીઠ રૂ. 60 હજાર હતો જે હવે રૂ. 80 હજારથી વધુ થઈ ગયો છે અને ગયા વર્ષે ચાંદીનો ભાવ રૂ. 70 હજાર હતો જે હવે રૂ. 1 લાખ સુધી પહોંચી ગયો છે. તેથી, વજનમાં વેચાણમાં ઘટાડો થયો હોવા છતાં, ચલણની દ્રષ્ટિએ વેચાણમાં વધારો થયો છે. આ ઉપરાંત, જૂના ચાંદીના સિક્કાઓની પણ ભારે માંગ હતી જે લગભગ સમગ્ર દેશમાં 1200 થી 1300 રૂપિયા પ્રતિ નંગના ભાવે વેચાતા હતા.
