PM મોદીએ લેબર પાર્ટીની જીત બાદ ઋષિ સુનકને આપ્યો ખાસ સંદેશ

UK Results 2024: વડાપ્રધાન નરેન્દ્ર મોદીએ યુકેની ચૂંટણીના પરિણામો બાદ લેબર પાર્ટીના નેતા કીર સ્ટાર્મરને અભિનંદન પાઠવ્યા છે. સામાન્ય ચૂંટણીના પરિણામોની ગણતરીમાં લેબર પાર્ટીએ મોટી જીત નોંધાવી છે, જ્યારે આઉટગોઇંગ વડાપ્રધાન ઋષિ સુનકની કન્ઝર્વેટિવ પાર્ટીને અત્યાર સુધીની સૌથી મોટી હારનો સામનો કરવો પડ્યો છે. જો કે સુનક પોતાની સીટ પરથી જીતવામાં સફળ રહ્યા છે. કીર સ્ટારમરની જીત બાદ વડાપ્રધાન મોદીએ સોશિયલ મીડિયા પ્લેટફોર્મ X પર લખ્યું હતું કે બ્રિટિશ સામાન્ય ચૂંટણીઓમાં અસાધારણ જીત માટે કીર સ્ટાર્મરને હાર્દિક અભિનંદન અને શુભેચ્છાઓ. હું પરસ્પર વિકાસ અને સમૃદ્ધિને પ્રોત્સાહન આપતા તમામ ક્ષેત્રોમાં ભારત-યુકે વ્યાપક વ્યૂહાત્મક ભાગીદારીને વધુ મજબૂત કરવા માટે અમારા સકારાત્મક અને રચનાત્મક સહયોગની આશા રાખું છું.

Heartiest congratulations and best wishes to @Keir_Starmer on the remarkable victory in the UK general elections. I look forward to our positive and constructive collaboration to further strengthen the India-UK Comprehensive Strategic Partnership in all areas, fostering mutual…

— Narendra Modi (@narendramodi) July 5, 2024

સુનક માટે પણ પીએમ મોદીનો ખાસ સંદેશ
બ્રિટનના આગામી વડાપ્રધાન બનવા જઈ રહેલા લેબર પાર્ટીના કીર સ્ટાર્મરને અભિનંદન આપવાની સાથે પીએમ મોદીએ ઋષિ સુનક માટે ખાસ સંદેશ લખ્યો છે. પીએમ મોદીએ ‘X’ પર લખ્યું, “બ્રિટનમાં તમારા પ્રશંસનીય નેતૃત્વ અને તમારા કાર્યકાળ દરમિયાન ભારત અને બ્રિટન વચ્ચેના સંબંધોને ગાઢ બનાવવામાં તમારા સક્રિય યોગદાન માટે ઋષિ સુનક તમારો આભાર. તમને અને તમારા પરિવારને ભવિષ્ય માટે ખૂબ ખૂબ શુભેચ્છાઓ. નોંધનીય છે કે સુનક ઓક્ટોબર 2022માં બ્રિટનના વડાપ્રધાન બન્યા હતા. તેઓ બ્રિટનના પ્રથમ ભારતીય મૂળના વડાપ્રધાન હતા.

કીર સ્ટાર્મર બ્રિટનના નવા પીએમ બનશે
બ્રિટિશ સામાન્ય ચૂંટણીમાં લેબર પાર્ટીની જંગી જીત બાદ કીર સ્ટાર્મર આગામી બ્રિટિશ વડા પ્રધાન બનશે. આ જીત સાથે ઋષિ સુનકના નેતૃત્વમાં કન્ઝર્વેટિવ પાર્ટીના 14 વર્ષ જૂના શાસનનો અંત આવ્યો છે. લેબર પાર્ટીએ 650 સીટોવાળી સંસદમાં સરળતાથી 326નો જાદુઈ આંકડો પાર કરી લીધો, જેના પછી સુનકે હાર સ્વીકારવી પડી. શુક્રવારે સવારે (સ્થાનિક સમય) લંડનમાં વિજય રેલીને સંબોધતા, સ્ટારમેરે કહ્યું: “પરિવર્તન હવે શરૂ થઈ ગયું છે. તેમણે વધુમાં કહ્યું કે આવો જનાદેશ મેળવવો એ એક મોટી જવાબદારી છે, જેમણે પોતાની સંસદીય બેઠક જાળવી રાખી છે, તેમણે કહ્યું કે બ્રિટિશ લોકોએ ગંભીર ચુકાદો આપ્યો છે અને કન્ઝર્વેટિવ પાર્ટીની રેકોર્ડ હારની જવાબદારી લીધી છે.