શેરબજાર ફરી નવી ઊંચાઈએ; સેન્સેક્સ-નિફ્ટી ઓલ ટાઈમ હાઈ પર બંધ

Share Market All Time High: સેન્સેક્સ 145.52 પોઈન્ટના ઉછાળા સાથે 80,664.86 પોઈન્ટની નવી ઓલ ટાઈમ હાઈ પર બંધ રહ્યો હતો.આ સાથે નિફ્ટી 84.55 પોઈન્ટના વધારા સાથે 24,586.70 પોઈન્ટની નવી વિક્રમી સપાટીએ બંધ રહ્યો હતો. દરમિયાન, અમેરિકન ચલણ સામે રૂપિયો નવ પૈસા ઘટીને 83.60 (અસ્થાયી) પ્રતિ ડોલર પર બંધ થયો હતો. વિદેશી ભંડોળના નવા પ્રવાહ અને સ્ટેટ બેંક ઓફ ઈન્ડિયામાં ખરીદીએ આજના ઉછાળામાં મહત્વની ભૂમિકા ભજવી હતી.

બીએસઈના 30 શેરોવાળો સેન્સેક્સ 145.52 પોઈન્ટ અથવા 0.18 ટકાના વધારા સાથે 80,664.86ના નવા રેકોર્ડ હાઈ પર બંધ થયો હતો. દિવસ દરમિયાન તે 343.2 પોઇન્ટ અથવા 0.42 ટકા વધીને 80,862.54ની ઉચ્ચ સપાટીએ પહોંચ્યો હતો. દરમિયાન, NSE નિફ્ટી 84.55 પોઈન્ટ અથવા 0.35 ટકા વધીને 24,586.70ની ટોચે બંધ રહ્યો હતો. દિવસ દરમિયાન તે 132.9 પોઈન્ટ અથવા 0.54 ટકા વધીને 24,635.05ની નવી વિક્રમી ઊંચી સપાટીએ પહોંચ્યો હતો.

કોને ફાયદો અને કોને નુકસાન?
સેન્સેક્સના શેર્સમાં સ્ટેટ બેન્ક ઓફ ઈન્ડિયા સૌથી વધુ 2.55 ટકા વધ્યો હતો. માર્જિનલ કોસ્ટ ઓફ ફંડ આધારિત વ્યાજ દર (MCLR)માં વધારાની જાહેરાત બાદ બેંકના શેરમાં વધારો થયો હતો. આ સિવાય એનટીપીસી, અલ્ટ્રાટેક સિમેન્ટ, મહિન્દ્રા એન્ડ મહિન્દ્રા, બજાજ ફાઈનાન્સ, ટાટા મોટર્સ, મારુતિ અને આઈટીસીમાં મોટો ઉછાળો રહ્યો હતો. બીજી તરફ, ખોટ કરતા શેરોમાં એશિયન પેઇન્ટ્સ, ટાટા સ્ટીલ, એક્સિસ બેન્ક, જેએસડબ્લ્યુ સ્ટીલ, ટેક મહિન્દ્રા અને ટાટા કન્સલ્ટન્સી સર્વિસિસનો સમાવેશ થાય છે.

વિદેશી બજારોની સ્થિતિ
એશિયન બજારોમાં સિઓલ અને શાંઘાઈમાં ઉછાળો જોવા મળ્યો હતો જ્યારે હોંગકોંગમાં ઘટાડો નોંધાયો હતો. યુરોપિયન બજારોમાં ઘટાડો નોંધાયો હતો. શુક્રવારે યુએસ બજારો સકારાત્મક ક્ષેત્રમાં બંધ થયા હતા. એક્સચેન્જ ડેટા અનુસાર, શુક્રવારે વિદેશી સંસ્થાકીય રોકાણકારો (FIIs)એ રૂ. 4,021.60 કરોડના શેર ખરીદ્યા હતા.વૈશ્વિક તેલ બેન્ચમાર્ક બ્રેન્ટ ક્રૂડ 0.18 ટકા વધીને $85.15 પ્રતિ બેરલ થઈ ગયું છે.

ગયા શુક્રવારે પણ આવી જ સ્થિતિ હતી
અગાઉ શુક્રવારે BSE બેન્ચમાર્ક 622 પોઈન્ટ અથવા 0.78 ટકા વધીને 80,519.34 પર અને નિફ્ટી 186.20 પોઈન્ટ અથવા 0.77 ટકા વધીને 24,502.15 પર બંધ થયો હતો.