દિલ્હીમાં ભાજપ શાસિત રાજ્યોના મુખ્યમંત્રીઓની બેઠક શરૂ, PM મોદી અમિત શાહ સહિત મોટા નેતા હાજર
![](https://newscapita7e21f6b31c.blob.core.windows.net/blobnewscapita7e21f6b31c/2024/07/NC-delhi-cm-meet.jpg)
દિલ્હી: છેલ્લા કેટલાય સમયથી ઉત્તર પ્રદેશને લઈને ભારે ઉત્તેજના છે. સતત બેઠકોનો દોર ચાલી રહ્યો છે. લખનૌથી તમામ હલચલ શાંત થઈને હવે દિલ્હીમાં કેન્દ્રિત થઈ ગઈ છે. યુપીના ભાજપના તમામ દિગ્ગજ નેતાઓ આજે શનિવારે દિલ્હી પહોંચ્યા છે. 24 કલાકમાં દિલ્હીમાં ઘણી મહત્વની બેઠકો થવાની છે. પહેલી બેઠક નીતિ આયોગની થઈ ગઈ. હવે બીજી બેઠક ભાજપ શાસિત રાજ્યોના મુખ્યમંત્રીઓ અને નાયબ મુખ્યમંત્રીઓની થઈ રહી છે. આ ઉપરાંત યુપી ભાજપના રાજકીય મુદ્દાના સમાધાન માટે એક અલગ બેઠક પણ યોજાવાની છે.
ભાજપના તમામ મુખ્યમંત્રીઓને મળશે પીએમ
વાસ્તવમાં, ભાજપના તમામ મુખ્યમંત્રીઓ અને નાયબ મુખ્યમંત્રી બેઠકમાં ભાગ લેવા માટે દિલ્હીમાં પાર્ટી હેડક્વાર્ટર પહોંચી ગયા છે. આ બેઠકમાં પીએમ નરેન્દ્ર મોદી, ભાજપ અધ્યક્ષ જેપી નડ્ડા અને કેન્દ્રીય ગૃહમંત્રી અમિત શાહ સહિત ઘણા મોટા નેતાઓ પણ હાજર છે. કહેવામાં આવી રહ્યું છે કે આ બેઠકમાં લોકસભા ચૂંટણીમાં થયેલ નુકસાન અને રાજ્યોની આગામી વિધાનસભા ચૂંટણીઓને લઈને ચર્ચા કરવામાં આવશે. યોગી આદિત્યનાથ, નાયબ સૈની, મોહન યાદવ, વિષ્ણુ દેવ સહાય, પુષ્કર ધામી, હેમંત બિસ્વા સરમા, પ્રમોદ સાવંત અને બીજેપીના અન્ય સીએમ અને ડેપ્યુટી સીએમ બેઠકમાં પહોંચ્યા છે.
ઉત્તર પ્રદેશ ભાજપનો મુદ્દો ઉકેલવા પણ થશે બેઠક
ત્યારબાદ, સીએમ યોગી અને ભાજપના ટોચના નેતાઓ વચ્ચે ઉત્તર પ્રદેશને લઈને મહત્વપૂર્ણ બેઠક થઈ શકે છે. અટકળોનું બજાર ગરમ છે. દરેક વ્યક્તિ જાણવા માંગે છે કે યુપીમાં શું ખીચડી રંધાઈ રહી છે. વાસ્તવમાં, UPના સીએમ યોગી આદિત્યનાથે લગભગ તમામ ભાજપના ધારાસભ્યો સાથે વાત કરી છે. બીજી તરફ ડેપ્યુટી સીએમ કેશવ મૌર્ય પણ ડઝનબંધ ધારાસભ્યો સાથે મુલાકાત કરી ચૂક્યા છે. આખરે, આ બેઠકોનો હેતુ શું છે? દરેક વ્યક્તિ આનો જવાબ જાણવા માંગે છે. તો, રાજકીય ગરમાવાને કારણે વિપક્ષ સતત ભાજપ પર નિશાન સાધી રહ્યું છે. અખિલેશ યાદવ સતત ભાજપની ડબલ એન્જિન સરકાર પર પોતાના કટાક્ષોથી નિશાન સાધી રહ્યા છે.