મુસ્લિમ મહિલાઓ માટે ટ્રિપલ તલાક ખતરનાક; કેન્દ્રએ SCમાં એફિડેવિટ દાખલ કરી
Triple Talaq: કેન્દ્ર સરકારે સુપ્રીમ કોર્ટને કહ્યું છે કે ટ્રિપલ તલાક સમાજમાં વૈવાહિક વ્યવસ્થા માટે ખતરનાક છે અને તે મુસ્લિમ મહિલાઓની સ્થિતિને દયનીય બનાવે છે. કેન્દ્ર સરકારે એફિડેવિટ દાખલ કરતી વખતે સુપ્રીમ કોર્ટમાં આ દલીલ આપી છે. કેન્દ્ર સરકારે કહ્યું કે, મુસ્લિમ સમુદાયમાં પ્રચલિત ટ્રિપલ તલાક વિરુદ્ધ સુપ્રીમ કોર્ટનો 2017નો આદેશ પણ તલાકના કેસોને ઘટાડવામાં સક્ષમ નથી. આવી સ્થિતિમાં તેનું અપરાધીકરણ કરવું જરૂરી છે.
કેન્દ્ર સરકારે કહ્યું કે, ટ્રિપલ તલાકનો ભોગ બનેલા લોકો પાસે પોલીસ જવા સિવાય કોઈ વિકલ્પ બચ્યો નથી. સાથે જ આ મામલે પોલીસ પણ લાચાર હતી કારણ કે કાયદામાં કડક કાર્યવાહીની જોગવાઈ ન હોવાને કારણે આરોપી પતિ સામે કાર્યવાહી કરવી મુશ્કેલ બની ગઈ હતી. હકિકતે, સુપ્રીમ કોર્ટમાં એક અરજીમાં કહેવામાં આવ્યું હતું કે જ્યારે કોર્ટે ટ્રિપલ તલાકને કાયદેસર જાહેર કર્યો છે, તો પછી તેને અપરાધ બનાવવાનો કોઈ અર્થ નથી. આ અરજી અંગે કેન્દ્ર સરકારે સુપ્રીમ કોર્ટમાં એફિડેવિટ દાખલ કરીને પોતાનો પક્ષ રજૂ કર્યું છે.
હકિકતે, આ મહિનાની શરૂઆતમાં જ, સમગ્ર કેરળ જમાઈતુલ ઉલમા વતી એક અરજી દાખલ કરવામાં આવી હતી. તે સુન્નીઓનું સંગઠન છે. અરજદારે મુસ્લિમ મહિલા (લગ્ન પછીના અધિકારોનું રક્ષણ) અધિનિયમ 2019ને ગેરબંધારણીય ગણાવ્યો હતો. અરજીકર્તાનું કહેવું છે કે આ મૂળભૂત અધિકારોનું ઉલ્લંઘન છે. તેને ધર્મના આધારે કોઈપણ કાયદા હેઠળ ગુનો ગણી શકાય નહીં.
કેન્દ્ર સરકારે અરજદારના દાવાને ફગાવી દીધો અને કહ્યું કે ટ્રિપલ તલાક મહિલાઓના મૂળભૂત અધિકારોનું ઉલ્લંઘન કરે છે. બંધારણમાં પણ મહિલાઓને સમાન અધિકારો આપવામાં આવ્યા છે. સંસદે સર્વસંમતિથી મહિલાઓના અધિકારોના રક્ષણ માટે કાયદો ઘડ્યો છે. આમાં લિંગ ન્યાય અને મહિલાઓના સમાનતાના અધિકારો સુનિશ્ચિત કરવામાં આવ્યા છે. તમને જણાવી દઈએ કે સુપ્રીમ કોર્ટે પહેલા જ કહી દીધું છે કે તે સંસદ દ્વારા બનાવેલા કાયદા પર વધારે ચર્ચા કરવા માંગતી નથી. કાયદો બનાવવાનું કામ વિધાનસભાનું છે અને તેમને તેમનું કામ કરવા દેવા જોઈએ.
