Punjab Accident: મુસાફરોથી ભરેલી બસની બ્રેક ફેલ, અકસ્માતમાં 10 લોકોના મોત, 20 ઘાયલ
Punjab Accident: ગુરદાસપુરના બટાલાથી કડિયા રોડ પર સ્પીડને કારણે હાહાકાર મચી ગયો છે. મુસાફરોથી ભરેલી બસ બેકાબુ થઇ ગઇ અને રોડ પરના બસ સ્ટોપ સાથે અથડાઈ હતી. બસ સ્ટોપની અંદર એક પોલ સાથે એટલી જોરથી ટકરાઈ કે આ ભયાનક અકસ્માતમાં અત્યાર સુધીમાં 8 થી 10 લોકોના મોત થયા છે અને 20 લોકો ઘાયલ થયા છે. તમામ ઘાયલોને હોસ્પિટલમાં દાખલ કરવામાં આવ્યા છે. અગાઉ વહીવટીતંત્ર દ્વારા 3 મૃત્યુની પુષ્ટિ કરવામાં આવી હતી, પરંતુ સૂત્રોના જણાવ્યા અનુસાર, મૃત્યુઆંક સતત વધી રહ્યો છે. એસએસપી બટાલા અને SMO સ્થળ પર હાજર છે. અત્યાર સુધીમાં ત્રણ લોકોના મોતની સત્તાવાર પુષ્ટિ કરવામાં આવી છે.
મળતી માહિતી મુજબ, આ અકસ્માત ગુરદાસપુરના શાહબાદ ગામ પાસે થયો હતો અને કહેવામાં આવી રહ્યું છે કે આ અકસ્માતમાં મૃત્યુ પામેલા તમામ લોકો નજીકના ગામોના રહેવાસી છે. બસમાં 40થી વધુ લોકો સવાર હતા. બસ બટાલાથી મોહાલી તરફ જઈ રહી હતી ત્યારે શાહબાદ ગામના બસ સ્ટોપેજ પાસે બસની બ્રેક ફેઈલ થઈ ગઈ હતી જેના કારણે બસ સ્ટોપેજમાં ગઈ હતી. જેના કારણે બસ સ્ટોપેજની લાઈનો બસ પર પડી હતી. રોડ પર જઈ રહેલી એક બાઇક અને સ્કૂટર પણ બસની નીચે ફસાઈ ગયા હતા.
ઘાયલોને એમ્બ્યુલન્સ દ્વારા બટાલા સિવિલ હોસ્પિટલમાં લઈ જવામાં આવ્યા છે. અકસ્માતમાં માર્યા ગયેલા લોકોના મૃતદેહને બટાલાના શબઘરમાં રાખવામાં આવ્યા છે. હજુ સુધી મૃતકોની ઓળખ થઈ શકી નથી. મૃત્યુ પામેલાઓમાં બસ ડ્રાઈવર પણ સામેલ છે. ગુરદાસપુર પોલીસ કેસની તપાસમાં વ્યસ્ત છે.
