ફિલ્મો સિવાય બિઝનેસમાં પણ સુપરહિટ છે કાજોલ, પદ્મશ્રીથી પણ સમ્માનિત

Happy Birthday Kajol: બોલિવૂડ અભિનેત્રી કાજોલનો આજે જન્મદિવસ છે. તેને કોઈ પરિચયની જરૂર નથી. તે હિન્દી ફિલ્મોની જાણીતી અભિનેત્રી છે. તેણે ઘણી સુપરહિટ ફિલ્મો આપી છે. અભિનયની કળા તેને વારસામાં મળી છે. કાજોલની માતા તનુજા અને દાદી શોભના સમર્થ પણ અભિનેત્રી રહી ચૂક્યા છે. તેની નાની બહેન તનિષાએ પણ ફિલ્મોમાં કામ કર્યું છે. અભિનેત્રીએ વર્ષ 1999માં અભિનેતા અજય દેવગન સાથે લગ્ન કર્યા હતા.

કાજોલે પોતાના કરિયરની શરૂઆત 1992માં રિલીઝ થયેલી ફિલ્મ ‘બેખુદી’થી કરી હતી. આ ફિલ્મથી તેને વધારે ઓળખ મળી ન હતી, કારણ કે આ ફિલ્મ બોક્સ ઓફિસ પર ખાસ કમાલ કરી શકી ન હતી. તેને 1993માં આવેલી ફિલ્મ ‘બાઝીગર’થી ઓળખ મળી હતી. આ ફિલ્મમાં તે બોલિવૂડ સુપરસ્ટાર શાહરૂખ ખાન સાથે જોવા મળી હતી. આ પછી તે ‘ઉધાર કી ઝિંદગી’, ‘હલચલ’, ‘ગુંડારાજ’માં જોવા મળી હતી.

1994માં આવેલી ફિલ્મ ‘યે દિલ્લગી’થી લોકોએ ફરી એકવાર કાજોલને નોટિસ કરી. આ રોમેન્ટિક ફિલ્મ પ્રખ્યાત નિર્દેશક યશ રાજે ડિરેક્ટ કરી હતી. આ ફિલ્મ બોક્સ ઓફિસ પર ઘણી સફળ રહી હતી. આ ફિલ્મ પછી, તે વર્ષ 1995 માં રિલીઝ થયેલી બે ખૂબ જ સફળ ફિલ્મોમાં જોવા મળી હતી. જેમાં કરણ-અર્જુન અને ‘દિલવાલે દુલ્હનિયા લે જાયેંગે’નો સમાવેશ થાય છે. ‘દિલવાલે દુલ્હનિયા લે જાયેંગે’ બ્લોકબસ્ટર ફિલ્મ સાબિત થઈ હતી. આ ફિલ્મમાં તે ફરી એકવાર શાહરૂખ ખાન સાથે જોવા મળી હતી. ફિલ્મમાં અભિનેત્રીના કામની ખૂબ પ્રશંસા કરવામાં આવી હતી.

1997માં રિલીઝ થયેલી ફિલ્મ ‘ગુપ્ત’માં તે નેગેટિવ રોલમાં જોવા મળી હતી. આ ફિલ્મ માટે તેને એવોર્ડ પણ મળ્યો હતો. આ દરમિયાન તે ‘હલચલ’, ‘ઈશ્ક’, ‘પ્યાર કિયા તો ડરના ક્યા’, ‘પ્યાર તો હોના હી થા’ અને ‘કુછ કુછ હોતા હૈ’માં જોવા મળી હતી. આ પૈકી તે તેના પતિ અજય દેવગન સાથે ઇશ્ક અને પ્યાર તો હોના હી થામાં જોવા મળી હતી. આ સમય દરમિયાન, વર્ષ 1999 માં, તેણે અજય દેવગન સાથે લગ્ન કર્યા. લગ્ન પછી પણ તે ‘રાજુ ચાચા’, ‘કભી ખુશી કભી ગમ’, ‘ફના’ વગેરે જેવી ઘણી ફિલ્મોમાં જોવા મળી હતી. તાજેતરના વર્ષોમાં, કાજોલ ‘લસ્ટ સ્ટોરીઝ 2’, ‘સલામ વેંકી’ વગેરે જેવી ફિલ્મોમાં જોવા મળી છે. ટૂંક સમયમાં તે આગામી ફિલ્મ ‘મહારાગિની’માં જોવા મળશે.

આ પણ વાંચો: ધોધમાર વરસાદ બાદ ગણદેવી તાલુકાના બીલીમોરા શહેર સહિત 14 ગામોમાં પુરની અસર

ફિલ્મો સિવાય કાજોલ બિઝનેસની દુનિયામાં પણ ઘણી એક્ટિવ છે. મીડિયા રિપોર્ટ્સ અનુસાર, તે મોડેલિંગ, બ્રાન્ડ એન્ડોર્સમેન્ટ અને તેના બિઝનેસમાંથી દર વર્ષે 25 કરોડ રૂપિયાથી વધુની કમાણી કરે છે. તેની પોતાની મેકઅપ બ્રાન્ડ પણ છે. રિપોર્ટ અનુસાર અભિનેત્રીની અંદાજિત કુલ સંપત્તિ 250 કરોડ રૂપિયા છે. ફિલ્મોમાં સતત જોવા ન મળવા છતાં તેને પસંદ કરનારા ચાહકોની સંખ્યામાં કોઈ ઘટાડો થયો નથી. ટાઇમ્સ ઓફ ઇન્ડિયા દ્વારા વર્ષ 2010માં તેમને મોસ્ટ ડિઝાયરેબલ વુમનનો ખિતાબ આપવામાં આવ્યો હતો. કાજોલને ભારતનું ચોથું સર્વોચ્ચ સન્માન પદ્મશ્રી પણ એનાયત કરવામાં આવ્યું છે.