અશ્વિન અધવચ્ચે મેચમાંથી બહાર, બીમાર માતાની ખબર જોવા પહોંચ્યો
રાજકોટ: ભારતીય ક્રિકેટ ટીમના સ્પિનર રવિચંદ્રન અશ્વિનને પારિવારિક મેડિકલ ઈમરજન્સીના કારણે શુક્રવારે રાજકોટમાં ઈંગ્લેન્ડ સામે ચાલી રહેલી ત્રીજી ટેસ્ટ મેચમાંથી બહાર થવું પડ્યું હતું. શુક્રવારે જ અશ્વિન ટેસ્ટ ક્રિકેટમાં 500 વિકેટ લેનારો ભારતનો બીજો અને વિશ્વનો 9મો બોલર બન્યો હતો. બીસીસીઆઈએ આ ઘટનાક્રમ અંગે અપડેટ આપી હતી. બોર્ડે એક નિવેદન જારી કર્યું, ‘રવિચંદ્રન અશ્વિન પારિવારિક મેડિકલ ઈમરજન્સીના કારણે તાત્કાલિક અસરથી ટેસ્ટ ટીમમાંથી બહાર નીકળી ગયો છે. આ પડકારજનક સમયમાં, ભારતીય ક્રિકેટ કંટ્રોલ બોર્ડ અને ટીમ અશ્વિનને સંપૂર્ણ સમર્થન આપે છે.
અશ્વિન કયા કારણોસર આઉટ થયો?
બીસીસીઆઈના ઉપાધ્યક્ષ રાજીવ શુક્લાએ સોશિયલ મીડિયા પર આ ઘટના વિશે વધુ એક અપડેટ આપ્યું અને લખ્યું કે અશ્વિનની માતાને મેડિકલ ઈમરજન્સી છે. તેમણે ટ્વિટર પર લખ્યું, ‘હું અશ્વિનની માતાના ઝડપથી સ્વસ્થ થવાની કામના કરું છું. તેને રાજકોટ ટેસ્ટ છોડીને માતા સાથે રહેવા ચેન્નાઈ જવું પડ્યું હતું.
બીસીસીઆઈએ કારણ જણાવ્યું નથી
ભારતીય ક્રિકેટ બોર્ડે અશ્વિનના નીકળી જવા પાછળનું ચોક્કસ કારણ જાહેર કર્યું ન હતું અને દરેકને ક્રિકેટરની પ્રાઇવસીનું સન્માન કરવા વિનંતી કરી હતી. નિવેદનમાં આગળ કહેવામાં આવ્યું છે કે- BCCI ચેમ્પિયન ક્રિકેટર અને તેના પરિવારને સંપૂર્ણ સમર્થન આપશે. ખેલાડીઓ અને તેમના પ્રિયજનોનું સ્વાસ્થ્ય અને સુખાકારી સર્વોચ્ચ મહત્વ ધરાવે છે. બોર્ડ વિનંતી કરે છે કે અશ્વિન અને તેના પરિવારની ગોપનીયતાનું સન્માન કરવામાં આવે કારણ કે અમે આ પડકારજનક સમયમાં આગળ વધીએ છીએ.
Wishing speedy recovery of mother of @ashwinravi99 . He has to rush and leave Rajkot test to Chennai to be with his mother . @BCCI
— Rajeev Shukla (@ShuklaRajiv) February 16, 2024
છેલ્લી બે ટેસ્ટમાં રમવા પર પણ સસ્પેન્સ
અશ્વિને મેચ બાદ પ્રેસ કોન્ફરન્સમાં ભાગ લીધો હતો અને ત્યારબાદ તે ચેન્નાઈ ગયો હતો. બીસીસીઆઈના સચિવ જય શાહે નિવેદનમાં કહ્યું કે, ‘બોર્ડ અને ટીમ અશ્વિનને કોઈપણ જરૂરી સહાય પૂરી પાડવાનું ચાલુ રાખશે અને જરૂર મુજબ સમર્થન આપવા માટે વાત કરવાનું ચાલુ રાખશે. ટીમ ઈન્ડિયા આ સંવેદનશીલ સમયમાં પ્રશંસકો અને મીડિયાની સમજણ અને સહાનુભૂતિની પ્રશંસા કરે છે.
ભારત ત્રીજી ટેસ્ટની બાકીની મેચ 10 ખેલાડીઓ અને ચાર નિષ્ણાત બોલરો સાથે રમશે. એવું માનવામાં આવે છે કે રાંચી (25-29 ફેબ્રુઆરી) અને ધર્મશાલા (7-11 માર્ચ)માં યોજાનારી બાકીની બે ટેસ્ટ મેચો માટે અશ્વિન ઉપલબ્ધ નહીં હોય.
